कनकाई अनलाईन
संघीय संरचना अनुसार झापामा नेपाली कांग्रेसको क्षेत्रीय समिति समायोजन गरिएको छ । स्थानीय तह संगठन पुनर्संरचना अन्तरिम व्यवस्था निर्देशिका–२०७६ अनुसार पार्टीको क्षेत्रीय समितिलाई संघीय संरचना अनुसार समायोजन गरिएको कांग्रेस झापा सभापति उद्धव थापाले जानकारी दिनुभयो ।
सात वटा निर्वाचन क्षेत्रअनुरुप क्रियाशील क्षेत्रीय समितिहरुलाई संघीय संरचना अनुसार ५ वटा बनाइएको उहाले बताउनुभयो । सभापति थापाले सहमति, भूगोल, क्षेत्रीय तथा क्रियाशील सदस्य संख्या, कार्यगत जेष्ठता तथा गोला प्रथाबाट झापाका पाँच वटै निर्वाचन क्षेत्रमा क्षेत्रीय सभापति चयन भएको बताउनुभयो ।
क्षेत्रीय सभापतिहरुमा झापा क्षेत्र नं।१ मा मणि उप्रेती, २ मा खगेन्द्र मैनाली, ३ मा गणेश पोखरेल, ४ मा जयनारायण शाह र ५ मा ढुण्डी भण्डारी सर्वसम्मत चयन भएका छन् । त्यस्तै उपसभापतिमा क्षेत्र नं। २ मा धर्म लक्सम्बा, ३ मा नविन विमली, ४ मा भीम राजवंशी र ५ मा रोहितकुमार शाह चयन हुनुभएको छ । तर क्षेत्र नम्बर १ मा भने उपसभापतिको चयन नभएको काँग्रेस झापाले जनाएको छ ।
