कनकाई अनलाईन
दुर्गापुर,८ कात्तिक÷ कनकाई नगरपालिका १ स्थित नवयुग शिक्षा निकेतन अंग्रेजी मावि, दुर्गापुरको आयोजनामा दिपेन्द्र स्मृति अन्तर माध्यमिक नकआउट भलिवल प्रतियोगीता सुरु भएको छ ।
वुधवारदेखी सुरु भएको प्रतियोगितामा दुधेको क्याम्व्रीज मावि सहित कनकाई नगरका अन्य ११ वटा निजी र सामुदायिक विद्यालय गरी जम्मा १२ वटा विद्यालयको सहभागिता रहेको वताइएको छ । प्रतियोगिताको प्रथम पुरस्कार नगद रु.८ हजार ५ रुपैंयाँ, मेडल र ट्रफी साथै दोस्रो पुरस्कार नगद रु ५ हजार ५ रुपैंयाँ, मेडल र ट्रफी प्रदान गरीने आयोजक विद्यालयले जनाएको छ । सहभागी विद्यालयहरुमा क्याम्व्रीज अंग्रेजी मावि, मेरीगोल्ड अमावि, भृकुटी मावि,दिव्यरत्न अमावि, चम्पाफ्लावर्स अमावि, पशुपति अमावि, नवयुग शिक्षा निकेतन,हरिकुल नमूना अमावि, फक्तालुङ् अमावि, देवकोटा अमावि,प्यारागन अमावि र चम्पापुर मावि रहेका छन् ।
२०६९ साल साउनमा सडक दुर्घटनामा परी निधन भएका आयोजक विद्यालयका तत्कालिन शिक्षक दिपेन्द्र शिवाकोटीको स्मृतिमा परिवारजनले स्थापना गरेको कोषवाट विद्यालयको सहयोगमा प्रतियोगिता संचालन गरीएको कोषका संरक्षक हरीप्रसाद शिवाकोटीले वताएका छन् । स्वर्गीय शिवाकोटीको पाँचौ स्मृतिमा आयोजित भलिवल प्रतियोगिताको शनिवार फाइनल खेल हुने वताइएको छ ।
विद्यालयका प्रिन्सिपल अखिल कोइरालाको अध्यक्षता रहेको उद्घाटन कार्यक्रममा स्थानिय शैक्षिक तथा सामाजिक संघ संस्थाका प्रमुख, जनप्रतिनिधीहरु, विद्यालयका अभिभावकहरुको सहभागिता रहेको थियो । विद्यालयका शिक्षक राजन कार्की (खड्ग)ले स्वागत गरेको कार्यक्रमको संचालन शिक्षक मनोज थापाले गरेका थिए ।