कनकाई अनलाईन
झापा, पूर्वापश्चिम राजमार्ग अन्तरगत बिर्तामोड सडक खण्डको रेखा पुल नजिकै आज विहान भएको बस दुर्घटनामा परी १३ जना घाइते भएका छन् ।
झापाको दमकबाट बनभोजका लागि इलामको कन्याम हिँडेको ना ६ ख ६१८१ नम्वरको वस दुर्घटनमा परेको हो । दुर्घटनामा परी घाइते भएका सबैको बिर्तामोडस्थित विएण्डसी अस्पतालमा उपचार भइरहेको जिल्ला ट्राफिक प्रहरी कार्यालय झापाका प्रहरी निरीक्षक होमप्रसाद अधिकारीले जानकारी दिनुभयो ।
प्रहरी निरीक्षक अघिकारीका अनुसार दुर्घटनामा परी वसका सह चालक मोरङ पथरी – १ निवासी ३० वर्षीय विकास लिम्बू सहित दमक – १० निवासी २७ वर्षीय सन्तोष खड्का , सोही ठाउँ निवासी १९ वर्षीय पवन खड्का, उर्लावारी – ३ निवासी १७ वर्षीया स्मृति धिमाल रहेका छन् ।
त्यस्तै दुर्घटनामा परी दमक १० निवासी १४ वर्षीय अभय धिमाल, मोरङ उर्लावारी ७ निवासी २२ वर्षीया माया घिमाल, दमक – १० निवासी १८ वर्षीया विविशा धिमाल, सोही ठाउँ निवासी १९ वर्षीया विनिता हमाल, २२ वर्षीय रोशन धिमाल, २८ वर्षीय नेत्र नेपाली, १८ वर्षीय आयुष नेपाली, १९ वर्षीय प्रदीप रिजाल र ४० वर्षीया नैनकला खड्का रहेका छन् ।
पिकअपको ठक्करबाट साइकल यात्रीको मृत्यु
शुक्रवार राति बिर्तामोड सडक खण्ड अन्तरगत नै आँखा अस्पताल अगाडि पिकअप भेनको ठक्करबाट साइकल यात्रीको मृत्यु भएको छ ।
जिल्ला ट्राफिक प्रहरी कार्यालय झापाका अनुसार सुर्खेत घर भएका १७ वर्षीय साइकल यात्री शिव सुवेदीलाई पिकअपले ठक्कर दिएको हो । पिक अपको ठक्करबाट उनको घटनस्थलमै मृत्यु भएको प्रहरीले जनाएको छ । उनीसंगै साइकलमा सवार १८ वर्षीय ताप्लेजुङ घर भएका लीला विष्ठ गम्भीर घाइते छन् । साइकललाई ठक्कर दिएलगत्तै पिकअप फरार रहेकाले चालक र पिकअपको खोजीकार्य जारी रहेको प्रहरीले जनाएको छ ।
