कनकाई अनलाईन
व्याङडाडा (शिबसताक्षी), २२ फाल्गुन–झापाको शिबसताक्षी नगरपालिकामा बैशाख ६ गतेदेखी नगर स्तरीय मेयर कप खेलकुद कार्यक्रमहरु गर्ने भएको छ । नगर खेलकुद विकास समितिले मंगलबार नगरापालिकाको कार्यालय व्याङडाडामा सरोकारवालाहरुसंग आयोजना गरेको अन्तरक्रिया कार्यक्रममा पाँचवटा खेलकुद कार्यक्रमहरु सम्पन्न गर्ने भएको हो ।
समितिका अध्यक्ष फुर्बा लामाको अध्यक्षतामा र नगर प्रमुख चन्द्रकुमार शेर्माको प्रमुख अतिथिमा कार्यक्रम भएको थियो । सो अवसरमा नगर प्रमुख शेर्माले खेल जगतको विकास र प्रवर्दनको निम्ति नगरपालिकाबाट सकारात्मक ढंङ्गमा सहयोग गर्ने बताए । उनले विकास निर्माण सडक, पुल र भवन जस्ता भौतिक निर्माण मात्रै नभएर साहित्य, कला र खेलकुद जगतलाई पनि विकास निर्माणसंगै लिएर अघि बढ्न नगरपालिकाको प्रथमसभाबाट नीति कार्यक्रम तथा बजेटमा राखेको जानकारी दिए ।
सो कार्यक्रममा नगरपालिका ११ वडाध्यक्षहरु, नगरमा दर्ता भएर खेल जगतसंग सम्बन्धीत रहेका कल्बहरुका प्रतिनिधिहरुको सहभागिता रहेको थियो । बैशाख ६ गतेबाट संञ्चालन हुने खेल कार्यक्रममा भलिबल, फुटबल, क्रिकेट, कराँते र एथलेथिक्सलाई समावेश गरिने नगर खेलकुद विकास समितिका अध्यक्ष फुर्बा लामाले जानकारी दिए ।
त्यस्तै, नगरपालिकाको सवै वडामा वडाध्यक्षको संयोजनमा वडा स्तरीय खेलकुद विकास समिति गठन गर्ने निर्यण भएको छ । खेलकुद विकास समितिको मातहतमा रहनेगरी नगरमा बिभिन्न खेलहरुको उचित विकास र प्रवर्दनको निम्ति अलग–अलग उपसमिति गठन गर्न आवश्यक रहेको फुर्वा लामाले जानकारी दिए । कार्यक्रममा नगरपालिकाका प्रमुख प्रशासकिय अधिकृत पंकज भुर्तेलको उपस्थिति रहेको थियो ।