कनकाई अनलाईन
झापाको बिर्तामोडमा मुख्य कार्यालय रहेको शिक्षा बहुउद्देश्यीय सहकारी संस्थाले चार जना सदस्यलाई सम्मान गरेको छ ।
संस्थाको एघारौं वार्षिक साधारण सभा अन्तरगत आज कनकाई–१ स्थित सदस्य सेवा केन्द्र दुर्गापुरको इकाइगत साधारण सभामा उनीहरुलाई सम्मान गरिएको हो । सम्मानित हुनेहरुमा उत्कृष्ट आवधिक बचततर्फ नरमाया बस्नेत, उत्कृष्ट शिक्षा बचततर्फ कृष्णराज राजवंशी, उत्कृष्ट ऋणीतर्फ कमला पौडेल र उत्कृष्ट साधारण बचततर्फ रुद्रप्रसाद भारती सम्मानित भएका हुन् । उनीहरुलाई कार्यक्रमका प्रमुख अतिथि कनकाई–१ का वडाध्यक्ष सुशीलकुमार पोखरेल, विशेष अतिथि वडा सदस्य निर्मला खड्का, संस्थाका अध्यक्ष सुब्रत न्यौपाने लगायतले सम्मान गर्नुभएको थियो ।
कार्यक्रममा प्रमुख अतिथि वडाध्यक्ष सुशीलकुमार पोखरेलले सबै सदस्यले संस्थाप्रति जिम्मेजार हुनुपर्नेमा जोड दिनुभयो । उहाँले सबै सहकारी खराब नहुने बताउँदै खराब सोच र उद्देयश्ले सञ्चालन भएका सहकारीहरुले मात्र गतल गर्ने गरेको उल्लेख गर्नुभयो ।
कार्यक्रममा विशेष अतिथि वडा सदस्य निर्मला खड्काले समाज रुपान्तरणमा सहकारी क्षेत्रको भूमिका महत्वपूर्ण भएको चर्चा गर्दै साधारणसभामा आउने जाने मात्र नभई संस्थाको समग्र अवस्थाका बारेमा सदस्य जानकार हुनुपर्नेमा जोड दिनुभयो ।
कार्यक्रममा संस्थाका अध्यक्ष सुब्रत न्यौपानेले वार्षिक प्रगति प्रतिवेदन प्रस्तुत गर्दै चालू आर्थिक वर्षमा संस्थाको आम्दानी बृद्धि हुने, रोजगारी सिर्जना हुने र सदस्यलाई आत्मनिर्भर एवम् व्यावसायिक बनाउने खालका योजना ल्याउने तर्फ संस्था केन्द्रित हुने बताउनुभयो । उहाँले गत आवमा तीन जना सेयर सदस्यको ३ लाख ५० हजार १३० रुपैयाँ कर्जा मिनाह गरिएको बताउनुभयो ।
संस्थाका लेखा समिति संयोजक युवराज निरौलाले लेखा समितिको प्रतिवेदन प्रस्तुत गर्दै आर्थिक संकटको जटिल अवस्थामा पनि संस्था लक्ष्य प्राप्तितर्फ अग्रसर हुँदै गएको बताउनुभयो । उहाँले आर्थिक वर्ष २०७९÷०८० मा संस्थाको कोष एक करोड ९८ लाख ९४ हजार २२६ रुपैयाँ पुगेको जानकारी दिनुभयो । त्यस्तै, शेयर पुँजी ३ करोड ४८ लाख ८१ हजार र बचत संकलन १६ करोड ८४ लाख ७ हजार १५८ रुपैयाँ रहेको उहाँले बताउनुभयो ।
कार्यक्रममा ऋण उपसमिति संयोजक एवम् संस्थाका उपाध्यक्ष हेमराज मिश्रले ऋण उपसमितिको प्रतिवेदन प्रस्तुत गर्दै आर्थिक वर्ष २०७९÷०८० मा संस्था कूल २९ करोड ५६ लाख ६२ हजार रहेको र कर्जा असुली ११ करो ४५ लाख ६१ हजार ८११ रुपैयाँ रहेको जानकारी दिनुभयो । संस्थाको लगानीमा रहेको ऋण १८ करोड ९ लाख १९० रुपैयाँ रहेको छ भने ऋणबाट ३ करोड ५३ लाख ४१ हजार ३३९ रुपैयाँ आम्दानी गरेको छ ।
संस्थाका सचिव सूर्यकुमार खतिवडाले सञ्चालन गर्नुभएको कार्यक्रममा स्वागत सञ्चालक समिति सदस्य चिजा राईले गर्नुभएको थियो । कार्यक्रममा संस्थाका सञ्चालक समिति सदस्य उमा राई, लक्ष्मीप्रसाद घिमिरे, लक्ष्मी देवान, संस्थाका कर्मचारी दुर्गा कटुवाल, डिल्ली दाहाल, गीता दाह लगायतको उपस्थिति रहेको थियो ।
मुख्य कार्यालय बिर्तामोडसहित शनिश्चरे, धाइजन, धुलाबारी, चैतुबारी र दुर्गापुर सदस्य सेवा केन्द्रमार्फत् सेवा प्रदान गर्दै आएको शिक्षा बहुउद्देश्यमा हाल चार हजार ७२० जना शेयर सदस्य छन् भने ३३ जना कर्मचारी कर्मचारी कार्यरत छन् ।
