कनकाई अनलाईन
झापामा सर्वसाधरणको साढे २४ करोड रकम ठगी गरि पक्राउ परेका झापा गौरादहका विश्वकर्मा दम्पती पुर्पक्षका लागि कारागार चलान भएका छन ।
झापा जिल्ला अदालतले मंगलबार गौरादह– १ का सुन व्यवसायी सोमराज विश्वकर्मा र उनकी श्रीमती सुभद्रा विश्वकर्मालाई पुर्पक्षका लागि थुनामा राख्न आदेश दिएसगै उनीहरु दुबैजनालाई कारागार चलान गरिएको जिल्ला प्रहरी कार्यालय झापाका प्रहरी प्रवक्ता प्रहरी नायव उपरिक्षक खगेन्द्र प्रसाद रिजालले बताउँनुभयो । विश्वकर्मा दम्पतीलाई कडा सुरक्षाबीच कारागार पठाइएको थियो ।
गौरादहका चार सय ६६ जनाको २४ करोड ६५ लाख तीन सय ५५ हिनामिना गरेर फरार भएका व्यवसायी विश्वकर्मालाई प्रहरीले साउन ४ गते पक्राउ गरेको थियो । प्रहरीले उनलाई पूर्वी नाका काँकडभिट्टाबाट नियन्त्रणमा लिएको थियो ।
उनले फरार हुनुअघि गौरादह नगरपालिका–१ का वडाध्यक्ष नगेन्द्र भण्डारीको मेसेन्जरमा आर्थिक समस्यामा परेका कारण आफू फरार भएको र खोजतलास नगर्नुहोला भन्ने सन्देश पठाएर फरार भएका थिए । विश्वकर्मा फरार भएसगै पीडितहरूले उनीविरुद्ध इलाका प्रहरी कार्यालय दमकमा ठगी मुद्दा दर्ता गरेका थिए । त्यसपछि प्रहरीले विश्वकर्मासहित उनकी श्रीमतीलाई पक्राउ गरी मुद्दा चलाएको हो । सो ठगी धन्दामा संलग्न अन्य २ जना भने अझै फरार रहेकोले खोजी कार्य जारी रहेको प्रहरीले जनाएको छ । विश्वकर्मा दम्पती गौरादहमा सुनचादीको व्यावसाय गर्दै आएका थिए उनीहरुको जिल्लाभरका सर्वसारणलाई महगो ब्याज दिने प्रलोभनमा पारि रकम संकलन गरि फरार भएका थिए ।
