प्रेमबहादुर तामाङ्ग
समाजसेवी शेरबहादुर थापा र कनकाई नगरपालिकाका प्रमुख प्रशासकिय अधिकृत मोहनप्रसाद न्यौपाने विशेष कार्यक्रमका बिच सम्मानित हुनुभएको छ ।
राजवंशी समाज विकास समिती केन्द्रीय समितिको आयोजनामा राजवंशी समुदायको धर्म संस्कार सम्बन्धी प्रथम राष्ट्रिय सम्मेलन कन्काई –९ घैलाडुब्बा, कोच संग्रहालय भवन टेकनारायण बारीमा आयोजित विशेष कार्यक्रमका बिच थापा र न्यौपानेलाई सरकारका संघिय मामिला तथा सामान्य प्रशासन मन्त्री अमनलाल मोदीले सम्मान गर्नुभएको हो ।
संस्थाका उपाध्यक्ष बद्रीनारायण राजवंशीको अध्यक्षता तथा संघीय मामिला तथा सामान्य प्रशासन मन्त्री अमनलाल मोदीको प्रमुख आतिथ्यमा भएको कार्यक्रममा संस्थाका केन्द्रीय अध्यक्ष अभय राजवंशीले स्वागतसहित औचित्यमाथी प्रकाश पारेका थिए ।
उनले राजवंशी समाजका धार्मिक तथा साँस्कृतिक मूल्य र मान्यताहरु जीवित राख्ने मुख्य धरोहरका रुपमा रहेका समाजका गुरुगसाई,किर्तिनिया,गाइन ठाकुरहरुको प्रथम राष्ट्रिय सम्मेलन आयोजना गरिएको बताए ।
आधुनिक विज्ञान र राजवंशीय हिन्दु धार्मिक मूल्य मान्यता बिचको अन्तरसम्बन्ध खोजिनु पर्ने आजको अपरिहार्य आवस्यकतालाई बुझ्ने प्रयासका लागि सम्मेलनको आयोजना गरिएको बताउँदै उनले माँ कामाख्या देवीको अनुकम्पाले टिष्टा देखि कोशी सम्मको भुगोल भित्र बसोबास गर्ने राजवंशी समुदायका पूर्वजहरुबाट पुस्तान्तरित हज्जारौं वर्ष देखि प्रयोग हुँदै आएका मन्त्रहरुको अतुलनीय र अविश्वसनीय शक्तिलाई विज्ञान सँग जोड्न सक्ने सामर्थ्य राख्न जरुरी भएको बताए ।
कार्यक्रममा कनकाई नगरपालिकाका प्रमुख प्रशासकिय अधिकृत मोहनप्रसाद न्यौपाने र कनकाई नगरपालिकाका समाजसेवी शेरबहादुर थापालाई सम्मान गरिएको थियो ।
अध्येता दर्पण राजवंशी लगायतले शुभकामना मन्तव्य राखेको कार्यक्रममा अरुणेदय इङलिस स्कूल घैलाडुव्वाका विद्यार्थीहरुले विभिन्न जातीय नृत्य प्रस्तुत गरेका थिए ।
कार्यक्रममा ठाकुर ब्रम्हाणी धर्मसंस्कार समितिले ठाकुर गाइन नृत्य प्रस्तुत गरेका थिए ।
सम्मेलनले नेपाल आदिवासी राजवंशी धर्म संस्कार समितीको गठन गर्नुका साथै राजवंशी धर्म संस्कार सम्बन्धि साझा घोषणापत्र जारी गरिने केन्द्रीय अध्यक्ष अभय राजवंशीले बताए ।
