कनकाई अनलाईन
झापाको बुट्टावारीमा भएको मोटरसाइकल दुर्घटनाका घाइतेमध्ये एकजनाको मृत्यु भएको छ ।
घाइते मोटरसाइकल चालक इलाम सूर्योदय नगरपालिका वडा नं. ५ बस्ने २४ वर्षीय दिवाङकर राईको उपचारका क्रममा शुक्रवार बिहान बीएण्डसी हस्पिटल बिर्तामोडमा मृत्यु भएको हो ।
भदौ १८ गते साँझ ५ बजे अर्जुनधारा नगरपालिका वडा नं.११ गिरीबन्धु टि–इस्टेटस्थित पूर्वपश्चिम राजमार्गमा मुक्तिचोकबाट काँकरभिट्टातर्फ जाँदैं गरेको मे १० प ३५४४ न.को मोटरसाइकल र धुलाबारीबाट मुक्तिचोकतर्फ आउँदै गरेको ना ५ ख ९१२२ न.को ट्रक एक आपसमा ठक्कर खाई दुर्घटना भएको थियो । दुर्घटनामा मोटरसाइकल चालक राई र पछाडी सवार मोरङ सुन्दरहरैचा नगरपालिका वडा नं. १० बस्ने २८ वर्षीय सुबोद बस्नेत घाइते भई दुवै जनालाई बीएण्डसी हस्पिटल लगिएको थियो । बस्नेतको सोही अस्पतालमा उपचार भइरहेको छ ।
ट्रक र ट्रक चालक झापा अर्जुनधारा नगरपालिका वडा नं.६ बस्ने ३१ वर्षीय संजय माझीलाई इलाका प्रहरी कार्यालय अनारमनीमा राखी थप अनुसन्धान कार्य जारी रहेको जिल्ला प्रहरी कार्यालय झापाले जनाएको छ ।
