कनकाई अनलाईन
झापाको अर्जुनधारा नगरपालिका ४ दहिझोडाबाट एउटा कटुवा पेस्तोलसहित एक जना पक्राउ परेका छन् ।
प्रहरीले स्थानीय ६२ बर्षिय इन्द्रबहादुर आङ्देम्बेलाई मंगलबार राति ८ बजेको समयमा कटुवा पेस्तोलसहित नियन्त्रणमा लिएको हो ।
घरमा अवैध रुपमा हातहतियार लुकाई छिपाई राखेको भन्ने गोप्य सुचनाको आधारमा इलाका प्रहरी कार्यालय अनारमनी बिर्तामोडबाट खटिएको प्रहरी टोलीले उनको घर परिसरबाटै उक्त पेस्तोल फेला पारेको थियो ।
उनको तलासी लिने क्रममा घरदेखी अन्दाजी ५ मिटर दक्षिणमा रहेको कुखुराको खोरको कासको छानो भित्र पहेलो प्लास्टिकमा पोका पारी लुकाई छिपाई राखेको अवस्थामा एउटा कटुवा पेस्तोल फेला परेकोले बरामद गरी उनलाईसमेत नियन्त्रणमा लिएको प्रहरीले जनाएको छ ।
उनलाई इलाका इलाका प्रहरी कार्यालय अनारमनीमा राखेर थप अनुसन्धान कार्य भइरहेको जिल्ला प्रहरी कार्यालय झापाले जनाएको छ । पछिल्लो समय झापामा साना हतियार समस्याका रुपमा देखा परेको छ । खुल्ला सिमाको फाइदा उठाउदै सहजै रुपमा झापामा हतियार उपलब्ध भएसगै यसलाई नियन्त्रण गर्न प्रहरीलाई मुख्य समस्याका रुपमा देखिएको छ ।
