कनकाई अनलाईन
झापाको मेचीनगरमा मोटरसाइकल दुर्घटनामा परी दुईजनाको मृत्यु भएको छ ।
मंगलवार गए राती ८.३० बजे मेचीनगर नगरपालिका वडा नं.१३ कालिझोडास्थित पूर्वपश्चिम राजमार्गमा बिर्तामोडबाट चारआलीतर्फ जाँदै गरेको मे.६ प. ८३२० नम्बरको मोटरसाइकलले पैदलयात्रीलाई ठक्कर दिई दुर्घटना भएको थियो ।
दुर्घटनामा पैदलयात्री हाल नाम थर वतन नखुलेका अन्दाजी बर्ष ३५–३६ का पुरुष घाइते भई उपचारको लागि बीएण्डसी अस्पताल बिर्तामोड ल्याइएकोमा उपचारको क्रममा राति १०.३५ बजे मृत्यु भएको हो ।
त्यस्तै मोटरसाइकल अनियन्त्रित भई पल्टिँदा मोटरसाइकलमा सवार मेचीनगर ९ बस्ने अन्दाजी बर्ष २९ का मन्दिप मेचे र सोही ठाउँ बस्ने अन्दाजी बर्ष २५ का सागर मेचेसमेत घाइते भई बीएण्डसी अस्पतालमै उपचार भइरहेकोमा सागर मेचेको बुधवार दिउँसो २ः५० बजे उपचारको क्रममा मृत्यु भएको जिल्ला प्रहरी कार्यालय झापाले जनाएको छ ।
अर्का घाइते मन्दिप मेचेको अवस्था सामान्य रहेको जनाइएको छ । सो सम्बन्धमा टोली खटिएर थप अनुसन्धान कार्य जारी रहेको झापाका प्रहरी प्रवक्ता समेत रहनुभएका प्रहरी नायव उपरिक्षक कृष्णकुमार चन्दले बताउँनुभयो ।
