कनकाई अनलाईन
दिलमाया स्मृति कप अन्तर्गत कनकाई तर्फको छनौट खेलमा आज वार्ड नम्बर ४ र ५ बिजयी बनेका छन ।
वडा नम्बर ४ ले १ लाई १–० गोल अन्तरले पराजित गर्दै बिजयी बनेको हो । ४ नम्बरको तर्फबाट पहिलो हाफको इन्जुरी समयमा पाएको फ्रि किकलाई सदुपयोग गर्दै संदिप रसाइलीले एकमात्र गोल गरे । यसपछि १ नम्बरका खेलाडीका धेरै प्रहारमा ४ का गोलकिपर मनिस मगर बाधक बन्दा कनकाई ४ बिजयी बनेको हो ।
यसैगरि आजै सम्पन अर्को खेलमा वार्ड नम्बर ५ ट्राईब्रेकरमा बिजयी बनेको छ ।
५ ले ७ नम्बर वार्डलाई ट्राईब्रेकरमा ६–५ गोलले पराजित गर्दै दोस्रो चरणमा प्रवेश पाएको हो । खेल अवधिभर र थप गरिएको समयमा समेत दुबै टिमबाट कुनै गोल हुन नसकेपछि खेल ट्राईब्रेकरमा धकेलिएको हो ।
कनकाई माविको खेल मैदानमा भइरहेको खेलबाट कनकाई नगरपालिकाका उत्कृष्ट २ टिमले दिलमाया स्मृति कपको क्वाटरफाइनलमा प्रवेश पाउने आयोजक दिलमाया स्मृति कप कनकाईका सहसंयोजक गोविन्द सुवेदीले बताउँनुभयो ।
झापा क्षेत्र नम्बर ४ का संघिय सांसद माननीय एलपी साँबा लिम्बुको ममतामयी माताको स्मृतिमा नेपाल खेलकुद महासंघको आयोजनामा प्रतियोगिताको आयोजना गरिएको हो । प्रतियोगितामा झापा क्षेत्र नम्बर ४ भित्रका २८ टिमको सहभागिता रहेको छ । प्रतियोगितामा बिजयी हुने टिमले नगद २ लाख २५ हजार र उपबिजयी हुने टिमले १ लाख २५ हजार रुपैँया पाउनेछन । यसैगरि उत्कृष्ट ८ टिमले समेत नगद पाउने मुल आयोजक समितिका संयोजक सुनिल भेटवालले बताउँनुभयो ।
यस प्रतियोगितालाई नेपालमा भएको हालसम्मकै वार्डस्तरीय प्रतियोगितामा सबैभन्दा वढी पुरस्कार राशीको प्रतियोगिता भएको दावी गरिएको छ।
