शरणामती,जेठ ६। मोरङको पथरीमा गएराती अन्दाजी १२ बजे सवारी दुर्घटना परि दुई जनाको मृत्यु भएको छ । पूर्व पश्चिम राजमार्ग अन्तर्गत पथरी शनिश्चरे नगरपालिका-२ जय चोकमा पुर्वबाट पश्चिम तर्फ आउदै गरेको मे १ च १८५१ नम्बरको स्कोरपियोलाई सोही दिशा तर्फ आउदै गरेको ना २ ख ९४७३ नम्बरको ट्रकले ठक्कर दिँदा दुई जनाको मृत्यु भएको प्रहरीले जनाएको छ।
मृत्यु हुनेमा झापाको झापा गाउँपालिका-६ शान्तीटोलका अन्दाजी ५५ बर्षिय लक्ष्मी भनिने लिलानाथ पौडेल र मोरङको रंगेली-३ रञ्जनी बस्ने अन्दाजी ७६ बर्षिया विष्णुमाया शिवाकोटी रहेको जिल्ला प्रहरी कार्यालय मोरङका प्रहरी नायव उपरिक्षक मान बहादुर राईले कनकाई अनलाइनलाई बताउनु भयो।
मृतक दुई जना बीच ज्वाइँ सासुको सम्बन्ध रहेको बताइएको छ ।झापाबाट उनीहरु पश्चिम तर्फ आफन्त बिरामी भेट्नका लागि जाने क्रममा सो दुर्घटना भएको बुझिएको छ।
दुर्घटनामा स्कोरपियोका चालक विर्तामोड-२ चारपानेका अन्दाजी ३३ बर्षिय बिकास उप्रेती, स्कोरपियोमा सवार मृतक पौडेलकी श्रीमती अन्दाजी ४५ बर्षिया बिनिता पौडेल र झापा हल्दिबारी गा.पा. वडा नं ५ का २५ बर्षिय रोशन उप्रेती गम्भिर घाईते भएका छन । उनीहरुको गोल्डेन अस्पताल विराटनगरमा उपचार भइरहेको प्रहरी उपरिक्षक राईले जानकारी दिनुभयो।
