भद्रपुर , कात्तिक २७ । जिल्ला प्रहरी कार्यालय झापा र त्यसमातहत रहेको प्रहरी कार्यालयहरूले करिब २० लाख एकतिस हजार पाँच सय मुल्य बराबरको बारुदजन्य पटाका बरामद गरेका छन् ।
एक महिनाको अवधिमा बरामद गरिएका विभिन्न प्रकारका पटाकालाई आज पत्रकार सम्मेलन गरेर जिल्ला प्रहरी कार्यालय झापाले कार्यालय परिसरभित्रै खाल्डो खनेर नष्ट गरेको छ । तिहार तथा छठ पर्वलाई लक्षित गरी भित्र्याएको पटाकाहरू प्रहरीले विशेष सूचनाको आधारमा बरामद गरेको हो । प्रहरीले घरमा छापा मारेर र सीमा नाकाबाट भित्रिँदै गरेको अवस्थामा ती पटाका बरामद गरेको प्रहरी कार्यालय झापाका प्रहरी उपरीक्षक कृष्णप्रसाद कोइरालाले बताउनुभयो ।
प्रहरीले अढाई सय सटसम्मको आकाशमा पड्किने पटाका, जगमग, खुर्सानी, झिरझिरे, अनार लगायत नाम गरेका पटाकाहरू भद्रपुर, काँकडभिट्टा, गौरीगञ्ज,हल्दीबारी,दमक,कचनकवल लगायतका क्षेत्रबाट बरामद गरेको प्रहरी उपरीक्षक कोइरालाले बताउनुभयो ।
