कनकाई अनलाईन
भाईको हत्याको गरेको आरोपमा झापामा दाजुलाई प्रहरीले पक्राउ गरेको छ । झापाको शिवसताक्षी–८ मा बिहीवार राति हत्या आरोपमा दाजु पक्राउ परेका हुन् ।
शिवसताक्षी–८ शितल चौकका ४१ वर्षीय रामप्रसाद सिटौलाको हत्या आरोपमा उनका दाजु ४५ बर्षिय नारायण सिटौलालाई पक्राउ गरिएको जिल्ला प्रहरी कार्यालय झापाले जनाएको छ ।
घटनापछि अनुसन्धानका लागि मृतकका दाजु नारायणलाई नियन्त्रणमा लिइएको इलाका प्रहरी कार्यालय झिलझिलेले जनाएको छ । राति ९ बजेर १० मिनेटमा सिटौलाको घरको पछाडिपट्टि उतानो परेको अबस्थामा रामप्रसादको शव फेला परेको थियो । इलाका प्रहरी कार्यालय झिलझिलेका प्रहरी निरीक्षक सुशिल थापामगरका अनुसार मृतकको शवलाई पोस्टमार्टमको लागि दमक अस्पताल पठाइएको छ।
उनको टाउकोमा चोट देखिएको छ । दाउराले प्रहार गरी हत्या गरेको हुनसक्ने आशंका गरिएको छ । घटनास्थल वरिपरि दाउरा छरिएको र रगत लतपतिएको थियो । घरभित्र ओछ्यानमा समेत रगत लागेको भेटिएको प्रहरीले जनाएको छ ।
उनलाई सुतेकै ठाउँमा दाउराले हानेको हुनसक्ने बताइएको छ । दुवै दाजुभाइले मादक पदार्थ सेवन गरी झगडा गरेको र नारायणले भाइलाई दाउराको चिर्पटले हत्या गरेको हुनसक्ने आशंका गरिएको छ ।
