कनकाई अनलाईन
झापा बिर्तामोड नगरपालिका ५ निवासी ५० बर्षिय माया मगरलाई मृत अवस्थामा फेला पारिएको छ । झापाको अर्जुनधारा –६ महानन्द चोक पश्चिम व्याडमिन्टन कोर्ट नजिकै उहाँ मृत फेला पर्नुभएको हो । उहाँको हत्या भएको हुन सक्ने आशंका गरिएको छ ।
उहाँको टाउकोमा ढुङ्गाले हिर्काए जस्तो देखिएको छ । प्रहरीका अनुसार घटना शंकास्पद भएकाले अनुसन्धानका लागि प्रदेशको टोली कुकुर सहित बिर्तामोड आउदैछ ।
बिर्तामोड प्रहरीका अनुसार घटनास्थललाई सुरक्षित राखिएको छ । सोमवार विहान फेला परेको शव बिर्तामोड ५ बस्दै आउनुभएको माया मगरको भएको खुलेको छ । ५० वर्षीय महिलाको टाउकोमा चोट देखिएको प्रहरीको भनाई छ । उहाँको माइतीघर इलामको माई नगरपालिका रहेको र माइतबाट समेत आफन्तहरुलाई खबर गरिसकेको प्रहरीले जनाएको छ । घटनास्थल वरपर रगत देखिएकोले समेत घटना रहस्यमय भएकाले अनुसन्धानका लागि टोली आउने बिर्तामोड प्रहरीका डिएसपी सुरज कार्कीले जानकारी दिनुभयो ।
