कनकाई अनलाईन
झापाको गौरादह स्थित कार्कीचोकमा मंगलवार बिहान सिटीसफारी र मिनी ट्रक एक आपसमा ठक्कर खाई भएको दुर्घटनामा एकको मृत्यु भएको छ ।
गौरादह डिपु चोकबाट गौरादह ३ बरगाछी तर्फ जादै गरेको गौरादह नगरपालिकाको ई ५३ नम्बरको सिटी सफारीलाई पानी कम्पनी बेलाको ना.अ.प.स. २५३ नम्बरको पिकअप गाडीले पछाडीबाट ठक्कर दिदा दुबै सवारी पल्टिएको थियो ।
दुर्घटनामा सिटी चालक गौरादह २ का अन्दाजी ५० वर्षीय रघुनाथ काफ्लेको मृत्यु भएको छ भने अन्य घाइते रहेको प्रहरीले जनाएको छ । दुर्घटनामा परी सिटिमा सवार गौरादह ३ बस्ने ५५ वर्षीया रमा नेपाल र सोही ठाउँकी ४४ वर्षीया मेनुका भण्डारी घाइते भएका छन् । त्यस्तै पिकअप चालक गौरीगञ्ज बस्ने राजेश दास पनि घाइते भएका छन् । घाइतेहरुको दमकमा उपचार भइरहेको दमक प्रहरीले बताएको छ । घटनाको बारेमा थप विवरण आउन बाँकी रहेको जिल्ला प्रहरी कार्यालय झापाले जनाएको छ ।
