कनकाई अनलाईन
कनकाई नगर खेलकुद विकास समितिद्धारा यहाँस्थित कनकाई माविको खेल मैदानमा आयोजित अन्तर वडा टि ट्वान्टी पुरुष क्रिकेट प्रतियोगिताको उपाधि वडा नम्बर ८ को टिमले हात पारेको छ ।
८ नम्बरको टिमले फाईनलमा ३ नम्बरको चुनौती १६ रनले पन्छाउदै नगद ३१ हजार सहितको पुरस्कार राशीको उपाधि रक्षा गरेको हो ।
उपबिजयी हुने कनकाई नगरपालिका ३ को टिमले नगद २१ हजारमा चित्त बुझायो । बिजयी तथा उपबिजयी हुने खेडाली र टिमलाई कनकाई नगरपालिकाकी उपप्रमुख आशाशर्मा शिवाकोटी, कनकाई नगरपालिका ८ का वडाध्यक्ष लीलाबहादुर कटुवाल, कनकाई नगर खेलकुद विकास समितिका संयोजक जविन तिम्सिना, राष्ट्रिय खेलाडी रोमा थापा,लायन्स क्लवका कनकाई अध्यक्ष संञ्जय गजुरेल, कनकाई नगर खेलकुद विकास समिति सदस्य गोविन्द उप्रेती लगायातले ट्रफि तथा प्रमाणपत्र प्रदान गर्नुभयो ।
पहिले ब्याटिङ गरेका ८ नम्बरले २० ओभरमा सबै विकेट गुमाउदै ८७ रनको स्कोर खडा गरेको थियो भने जवाफी ब्याटिङ थालेको ३ नम्बरले १९ ओभरमा सबै विकेट गुमाउदा ७१ रनमात्रै बनाउन सक्यो । ८ नम्बरका खेलाडी शेखर घिमिरेले एक्लै ५ विकेट लिनुभएको थियो । यता ३ नम्बरका खेलाडी प्रनिस बिमलीले २४ रन बनाएपनि टिमको हार टार्न भने सकेनन ।
प्रतियोगिताकै सर्वोकृष्ट खेलाडी वडानम्बर ८ का किरण रणपहेली हुनुभयो ।
यहि मंसिर १ गतेदेखि ७ गतेसम्म संञ्चालन गरेको प्रतियोगितामा कनकाई नगरका ९ वटा वडाको ११ टिमको सहभागिता रहेको थियो ।
उक्त प्रतियोगिताबाट २२ जना खेलाडी छनौट समेत गरिएको र उक्त टिमलाई बन्द प्रशिक्षणमा राखेर कनकाई नगरपालिकाको टिमबाट विभिन्न खेल प्रतियोगितामा सहभागि हुने कनकाई खेलकुद विकास समितिका संयोजक जविन तिम्सिनाले बताउँनुभयो ।
