हिमाल खरेल
नेपाली क्रिकेट टोलीले एसिया कपमा विश्व वरियताको नम्बर वान टोली पाकिस्तान र तेस्रो स्थानमा रहेको भारतसँग पहिलो पटक खेल्यो । नेपाल प्रतिस्पर्धात्मक प्रदर्शनका साथ सम्मानजनक हारका साथ बाहिरिएपछि विश्वभरबाट वाहीवाही पायो ।
पाकिस्तानसँग २ सय ३८ रन र भारतसँग १० विकेटको हारले नेपाल सुपर फोरमा पुग्न सकेन । यो नेपालको अपेक्षा अनुसारको नतिजा पनि थियो । भारतसँग नेपालले अपेक्षा गरेको भन्दा धेरै राम्रो क्रिकेट खेल्यो । पाकिस्तानविरुद्ध वर्तमान विश्व क्रिकेटका एक उत्कृष्ट ब्याटर बाबर आजम र मोहम्मद रिजवान जस्ता ब्याटरविरुद्ध बलिङमा राम्रो प्रभाव छाड्यो ।
भारत र पाकिस्तानसँगको खेलपछि विश्व क्रिकेटमा पुन नेपाली क्रिकेटको चर्चा चुलिएकोछ । क्रिकेट मैदानको अभाव र देशको राम्रो लगानीबिना नै नेपाली खेलाडीले आफ्नो क्षमता प्रस्तुत गरेर एकपटक फेरि अब्बल पुष्टि गरेका छन् । तर, राज्य भने क्रिकेटमा लगानी गर्नेतर्फ एकदमै सुस्त देखिन्छ ।
क्रिकेट विकासमा मैदान निर्माण अनिवार्य छ । सफलतामा वाहवाही गर्ने नेपाल सरकार साँच्चै क्रिकेट विकास गर्नपछि छ । नेपालमा मैदान निर्माणको लागि सरकारले घोषणा गरेपनि दशक भन्दा बढी समयसम्म काम हुन नसकेका थुप्रै उदाहरण छन् । एउटा गतिलो उदाहरण झापाको भद्रपुरस्थित मेची बहुमुखी क्याम्पसमा रहेको क्रिकेट मैदान पनि हो ।
झापाको भद्रपुरस्थित मेची बहुमुखी क्याम्पसमा रहेको क्रिकेट मैदानको अवस्थाबारे न नेपाल क्रिकेट संघले ध्यान दिएको छ न सरकारलाई चासो छ । क्याम्पसको जग्गामा क्रिकेट मैदान निर्माण तथा सञ्चालन गर्ने सहमति भएको १५ वर्ष बितिसकेको छ । तर, काम भने शून्य ।
नेपाल क्रिकेट संघ र मेची बहुमुखी क्याम्पसबीच मेची क्याम्पस क्रिकेट मैदान सञ्चालनका लागि दुई पक्षीय सम्झौता भएको थियो । २०६५ जेठ २१ गते भएको सो सम्झौतामा संघको तर्फबाट सदस्य छत्रप्रसाद अधिकारी र क्याम्पसको तर्फबाट तत्कालीन क्याम्पस प्रमुख टिका प्याकुरेलले हस्ताक्षर गरेका छन् ।
२०९० जेठ २० गतेसम्मका लागि क्याम्पसले संघलाई वार्षिक २५ हजार रुपैयाँ भाडा तिर्नेगरी क्याम्पस परिसरभित्र रहेको पुस्तकालयको उत्तरपूर्वको जग्गा उपलब्ध गराउने सम्झौता भएको थियो । सो ठाउँमा १५ वर्षको बीचमा मैदान सम्याउने कामबाहेक केही पनि हुन सकेको छैन । संघमा भएको राजनीतिकरण तथा आपसी खिचातानीको शिकार भद्रपुरको क्रिकेट मैदान पनि भएको हो ।
यअघि २०७८ माघमा संघका तत्कालीन १ नम्बर प्रदेश सचिव मनोज कटवालको नेतृत्वमा मैदानको अवस्था र सम्भाव्यत अध्ययनका लागि स्थलगत भ्रमण गरेका थिए । भद्रपुर क्रिकेट मैदान बनेको खण्डमा बंगलादेश, भारत, नेपाल, भुटान सम्मिलित अन्तर्राष्ट्रिय क्रिकेट शृंखलाहरु खेलाउन उपयुक्त हुने कटवाल बताउँछन् ।
उक्त मैदानमा २०६७ फागुनमा विनेश बर्मा स्मृति राष्ट्रिय क्रिकेट प्रतियोगिता सञ्चालन भएको थियो । प्रतियोगिता नेपाल सशस्त्र प्रहरी बलले जितेको थियो ।
मैदानमा नेपालका अधिकांश राष्ट्रिय खेलाडीहरुका साथै पूर्वकप्तान पारस खड्का, पूर्वकप्तान ज्ञानेन्द्र मल्ल, पूर्वकप्तान विनोद दास, शरद भेषावकरलगायत खेलाडीले सहभागिता जनाएका थिए ।
