कनकाई अनलाईन
नेपाल खेलकुद महासंघ कनकाई नगर कमिटिको आयोजनामा आजबाट झापाको कनकाई नगरपालिका ५ तुलसीवारीमा प्रथम वडास्तरीय फुटबल प्रतियोगिता सुरु भएको छ ।
झापा क्षेत्र नम्बर ४ का प्रतिनिधिसभा सदस्य माननीय एलपीसाँबा लिम्बुले आज विशेष कार्यक्रमका विच प्रतियोगिताको उद्घाटन गर्नुभयो । उदघाटन खेलमा कनकाई ५ नम्बर वार्ड बिजयी भएको छ । ५ नम्बर वार्डले ९ नम्बरलाई ३—० गोल अन्तरले पराजित गर्दै बिजयी बनेको हो । बिजयी टिमका तर्फबाट ३ वटै गोल पहिलो हाफमा सम्भव भएको हो ।
बिजयी टिमका तर्फबाट रोचन लिम्बुले २ गोल र विशाल राईले १ गोल गर्नुभयो । खेलको म्यान अफ द म्याच बिजयी टिमका २ गोलकर्ता रुचन लिम्बु हुनुभयो । उहाँलाई बिहानी फर्निचर उद्योगका प्रोपाइटर गणेश दाहालले नगद पुरस्कार प्रदान गर्नुभयो । भोली आइतवारको खेल वार्ड नम्बर १ र २ को टिमविच हुने आयोजक समितिका खेल संयोजक पुर्ण लिम्बुले बताउँनुभयो ।
आजै भएको उदघाटन खेलमा बोल्दै प्रमुख अतिथि साँसद साँबाले खेललाई मनोरञ्जनका रुपमा मात्रै नलिएर व्यावसायिकरण गर्नेतर्फ सबैको ध्यान जान जरुरी भएको बताउँनुभयो । यसका लागि तीनै तहका सरकारले भुमिका खेल्नुपर्ने भन्दै साँबाले हरेक वार्डमा एउटा रङ्गशालाको अभियान देशमा सुरु भइसकेको जानकारी दिनुभयो ।
देशमा खेललाई पनि समृद्धि र रोजगारीमा जोडन ढिला गर्नुहुदैन फुटबल खेल मात्रै नभएर अन्य खेलको विकास र व्यावसायिकरणमा हाम्रो ध्यान जान जरुरी बनिसकेको छ । साँबाले भन्नुभयो ।
प्रतियोगितामा कनकाई ५ नम्बर वार्डका वडाअध्यक्ष कृष्णबहादुर राई, कनकाई नगर खेलकुद विकास समितिका अध्यक्ष जविन तिम्सिना, समाजसेवी शेरबहादुर थापा, अखिल नेपाल महिला संघकी सुनिता खरेल लगायातले शुभकामना मन्तव्य राख्नुभएको कार्यक्रमको संचालन प्रताव राई र सभापतित्व नेपाल खेलकुद महासंघका नगर अध्यक्ष गोविन्द सुवेदीले गर्नुभएको थियो ।
आगामी वैशाख २३ गतेसम्म चल्ने प्रतियोगिताको बिजयी तथा उपबिजयी हुने टिमले जनही नगद ३१ हजार र २१ हजार र ट्रफि पाउने छ ।
प्रतियोगितामा नगरका ९ वटै टिमले भाग लिएका छन ।
