कनकाई अनलाईन
– ललितपुर महानगरपालिका उप मेयर कप राष्ट्रिय लिग २०७८ को लागि छनोट भएको छ । शुक्रबार भएको छनोट प्रतियोगिताको सेमिफाइनलमा कन्काई नगरपालिका झापालाई १(० ले पराजित गर्दै ललितपुर राष्ट्रिय लिगमा स्थान बनाउन सफल भयो ।
ललितपुरको जितमा कप्तान निर्मला विकले एकमात्र गोल गरिन् । उनले पहिलो हाफमा गरेको गोल नै निर्णायक सावित भएको थियो । कन्काईका लागि दिपा शाहीले दुवै हाफमा पेनाल्टी क्षेत्र बाहिरबाट गरेको प्रहार क्रसबारमा लाग्दा कन्काई अभागी सावित भएको थियो ।
आज हुने दोस्रो सेमिफाइनलमा गौरिगंगा नगरपालिका कैलाली र धनगढी उपमहानगरपालिका खेल्दैछन् । यस खेलको विजेता पनि राष्ट्रिय लिगको लागि छनोट हुनेछ । छनोट प्रतियोगिताको फाइनल आइतबार हुनेछ ।
छनोट प्रतियोगितामा सहभागी ३१ टोलीलाई १० समूहमा विभाजन गरिएको थियो । हरेक समूहको शीर्ष टोली नकआउट चरणमा प्रवेश गरेका थिए । प्रतियोगिताको विजेता र उपविजेता टोली राष्ट्रिय लिगमा छनोट हुनेछन् ।
प्रतियोगिताको विजेताले ५ लाख नगद पुरस्कार पाउनेछन् । यस्तै उपविजेताले ३ लाख र फेयर प्ले टिमले ५० हजार तथा प्रतियोगिताको सर्वोकृष्ट खेलाडीले ५० हजार र विधागततर्फ उत्कृष्ट हुनेले समान २०–२० हजार प्राप्त गर्नेछन् ।
