शरणामती,बैशाख २।भलिवल युवा परिवार झापा गाउँपालिका वडा नं ७ को आयोजनामा संचालित अन्तर वडा स्तरिय भलिवल प्रतियोगीताको फाईनल खेल बिहिबार सम्पन्न भएको छ ।
फाईनलमा आयोजक टिम र झापा गाउँपालिका-६ शरणामती बीच भएको प्रतिस्पर्धामा ३-० सोझो सेटमा आयोजकलाई हराउँदै शरणामतीले उपाधि रक्षा गरेको हो । विजेता बनेको शरणामतीको टीमले नगद १० हजार सहित ट्रफी र मेडल पाएको छ । त्यसैगरी उपविजेता टीम आयोजकले नगद ७ हजार ५ सय सहित ट्रफी र मेडलमा चित्त बुझाएको छ ।
त्यस्तै फाइनल खेल सुरु हुनु अघि झापा गाउँपालिका महिला भलिवल टिम “क” र “ख” बिच भएको डमी खेलमा “क” ले २-१ को सेटमा “ख” लाई हराउँदै उपाधी कब्जा गरेको छ।बिजेता बनेको टिमले नगद १ हजार ५ सय सहित ट्रफी र मेडल पाएको छ भने उपबिजेता बनेको टिमले नगद १ हजार सहित ट्रफी र मेडल पाएको छ।
अन्तर वडा स्तरिय भलिवल प्रतियोगितामा वडाका ७ वटा टिमले भाग लिएको खेल समितिका सचिव रोहित कार्कीले जानकारी दिएका छन् ।
खेल समितिका संयोजक बाल कुमार कार्कीको अध्यक्षतामा सम्पन्न भएको प्रतियोगिता समापन कार्यक्रमको प्रमुख अतिथि झापा गाउँपालिका-७ का वडाध्यक्ष नेत्र प्रसाद उप्रेती रहेका थिए।कार्यक्रममा झापा गाउँपालिका भलिवल टिमका क्याप्टेन गजेन्द्र ताम्ली लिम्बु लगायतको आतिथ्यता रहेको थियो।
