कनकाई अनलाईन
ठुलो परिणामको लागु औषध ब्राउन सुगर सहित आइतबार आज कनकाई नगरपालिका ४ सुरुङ्गाका एक व्याक्ति पक्राउ परेका छन ।
इलाका प्रहरी कार्यालय सुरुङ्गाका प्रमुख पदमसुन्दर लिम्बुको नेतृत्वमा गएको प्रहरी टोलीले कनकाई ४ का प्रदिप बुडाथोकीलाई १७ ग्राम अबैध लागुऔषध ब्राउन सुगर र नगद २३ हजार सहित आफ्नै घरबाट पक्राउ गरेको हो । सुरुङ्गाकै एक होटलमा काम गर्ने महिला प्रयोगकर्तालाई ब्राउन सुगर बिक्री गर्न खोज्दा बुडाथोकी पक्राउ परेको प्रहरीले जनाएको छ ।
बुडाथोकी लामो समयदेखि ब्राउन सुगरको विक्री गर्दै आएको प्रहरीको दावी छ । पक्राउ परेका बुडाथोकी र बरामद ब्राउन सुगर र नगद इलाका प्रहरी कार्यालय बिर्तामोडमा राखि प्रहरीले अनुसन्धान सुरु गरेको इलाका प्रहरी कार्यालय सुरुङ्गाले जनाएको छ । लक डाउनका वेला अबैध कारोवार गर्ने वुडाथोकीलाई पक्राउ गरेसगै प्रहरीले ठुलो सफलता पाएको छ । सुरुङ्गा क्षेत्रमा पछिल्लो समय लागुऔषधको अवैध कारोवार वढेसगै प्रहरीले पनि थप सक्रियता वढाएको छ ।
