मैले जिते , एकघर एक रोजगारी गणेश पोखरेल भद्रपुर मेयरका उम्मेद्धार


 

 
वि सं २०३१ साल पौष ६ गते साविक पृथ्वीनगर ६ मा जन्मिएका नेपाली काँग्रेसका युवा नेता गणेश पोखरेल २५ वर्षयता झापाको सदरमुकाम भद्रपुरलाई केन्द्र विन्दु बनाएर राजनीतिमा सक्रिय भूमिका खेलिरहेका व्यक्ति हुन् ।

वि सं २०४६ सालमा वीरेन्द्र माध्यमिक विद्यालय चन्द्रगढीमा कक्षा ९ मा अध्ययन गर्दा गर्दै नेपाल विद्यार्थी संघको सदस्यता लिएर राजनीतिमा होमिएका पोखरेल मेची बहुमुखी क्याम्पस भद्रपुरमा २०५७ देदि २०६१ सम्म स्वतन्त्र विद्यार्थी युनियनको सभापतिको दुई कार्यकाल सफलता पूर्वक निर्वाह गरिसकेका छन् ।

नेपाली काँग्रेसको ११ औं महाधिवेशनबाट झापा क्षेत्र नम्वर ३ को क्षेत्रीय सचिवको जिम्मेवारी लिएर पार्टी राजनीतिमा पूर्णकालिन सेवक भएका पोखरेल १२ औं महाधिवेशनपछि हालसम्म पनि सो क्षेत्रको क्षेत्रीय सभापतिको जिम्मेवारीमा रहेका छन् । आसन्न स्थानीय तह निर्वाचनमा नेपाली काँग्रेसको तर्फबाट भद्रपुर नगरपालिकाको मेयरका रुपमा उम्मेद्वार रहेका पोखरेलसित कनकाई अनलाईनका लागि द्रोण अधिकारीले गरेको कुराकानी ।
तपाईको उम्मेद्वारी के का लागि ?
मेरो उम्मेद्वारी लोकतान्त्रिक व्यवस्था सहितको समाजवादी संधीय अधिकार जनताको घरघरमा पुर्याउन हो । यस नगरपालिकामा भएको निर्वाचनमा जित्ने त धेरै आए गए तर जनपक्षीय रुपमा लोकतान्त्रिक शासकीय कार्य गर्ने कोही देखिएनन् ।

नगरमा सडक नाम मात्रका बनाइए जसले जनतालाई आर्थिक उन्नतिसित जोड्न सकेको छैन । समग्र नगरको विकासका लागि बाटाघाटादेखि पुल पुलेसासम्मको स्तर बृद्धि जरुरी छ । यी र यस्ताखाले दैनिक जीवनयापनका समस्याको हलदेखि प्रविधि मैत्री वातावरण निर्माण गरेर २१ औं शताब्दी अनुकुलको विकास निर्माणसम्मका कामहरु पूरा गर्न मेरो उम्मेद्वारी आएको हो ।

सम्बृद्ध शहर भद्रपुर हुनका लागि स्मार्ट नगर बनाउने अभियानको कार्य तालिका लक्ष्यका रुपमा रहेको छ । जल, जमिन र जंगललाई आर्थिक विकासको आधार बनाउने दीर्घकालिन रणनीति बनाएको छु । युवालाई उत्पादनसित जोडिने वातावरण निर्माण गर्ने छु । अझ भन्दा सुस्त भएको भद्रपुरको मुहार फेर्ने अभियान मेरो उम्मेद्वारीको पहिलो प्रतिबद्धता हो ।

यसैले पनि यो निर्वाचनमा मेरो उम्मेदवारी आवश्यक भएर आएको हो । भाषण र आश्वासनको भारी बोकाएर जनमत तान्ने अभियानको विपक्षमा रहेको हुँदा मैले नगरलाई समुन्नत बनाउन भ्रष्टचार ढिलासुस्ती जस्ता जनविरोधी कार्य रोक्न विशेष रणनीति बनाएर अगाडि आएको छु । युवा पुस्ताले नेतृत्व नलिएसम्म नगरको विकास सम्भव नदेखिएकोले नगर बनाउनका लागि मैले उम्मेद्वारी दिएको हुँ ।

 

यो निर्वाचन मार्फत नगरबासीले मलाई सवल भद्रपुर बनाउने अभियानमा नेतृत्व दिने छन् । अब भद्रपुर नगर दुर्वल हुने दिन सकिदै छ । जसका लागि नेपाली काँग्रेसले नेतृत्व पाउनु जरुरी छ ।

 

सम्बृद्ध भद्रपुरको आधार के हो ?

सम्बृद्ध भद्रपुरको आधार भनेकै पर्यटन, व्यापार र कृषिको उन्नति हो । जहाँ युवा वर्गलाई जोड्न सकियो भने भद्रपुर आफैं सम्बृद्ध हुन्छ । यसका लागि मैले भद्रपुर नगरको नेतृत्व पाउने हो भने सम्पन्न भद्रपुर बनाउने योजना कार्यान्वयनमा आउने छन् ।

नगरमा पर्यटन आगमनलाई आर्थिक उन्नतिमा जोड्न उत्तरमा चन्द्रगढ तथा चन्द्रगढी सिमसार क्षेत्र छन् भने दक्षिणमा किच्चकबध तथा कमलधाप क्षेत्र छन् । यी क्षेत्रमा पर्यटक आगमनको वातावरण बनाउन बृहद गुरु योजना बनाएको छु ।

यो योजना कार्यान्वयन हुने हो भने सुनसान शहर भद्रपुरलाई जीवन दिन सक्ने छ । यसैगरी भद्रप्ुरको व्यापारिक शाख माथि उठाउन मेचीपुल र मेची राजमार्ग एवम् हुलाकी सडकको निर्माण प्रमुख रुपमा रहेको छ । जसलाई निर्माण सम्पन्न गराउनका लागि मेरो खवरदारी रहने छ । यस नगरका गरिब, मजदुर तथा सिमान्तकृत वर्गको जीवनस्तर उकास्नका लागि आफू प्रतिबद्ध भएर लाग्ने छु ।

गरिबका छोराछोरीले साइकल चढेर विद्यालय जानपाउने बतावरण बनाउने छु भने स्मार्ट शहरको अनुभूतिका लागि प्रत्येक टोल टोलमा निशुल्क वाईफाई सेवा प्रवाह गर्ने छु । नगरबासीको स्वास्थ्य सुरक्षाका लागि अञ्चल अस्पताललाई स्तरीकरण एवम जनमैत्री सेवा प्रवाह गर्ने मेडिकल कलेजको रुपमा स्वास्थ्य प्रतिष्ठान बनाउँदै गरिवका छोराछोरीले डक्टर बन्न सक्ने वातावरण निर्माण गर्ने छु । यस नगरमा शिक्षा स्वास्थ्य र रोजगारीको वातावरण बनाउने योजना मसित छन् । मेरो विजयसँगै भद्रपुर नगरको सम्बृद्धिको सुरुवात हुने छ ।

नगरबासीको जीवनस्तर उकास्ने योजना के के छन् ?
ऐतिहासिक नगर भद्रपुरका बासिन्दाहरुको आर्थिक स्तर उकास्न रोजगारका लागि अवसरहरु कृषि, व्यापार र उद्योग प्रर्वधन जरुरी छ । यहाँ अलमलमा परेका यस्ता धेरैअवर छन् ।

ती अवरको सदुपयोगको वातावरण बनाउने नेतृत्व मबाट मात्र संभव छ । यस नगरका गरिब, सुकुमम्बासीको संरक्षणका लागि शिक्षा, स्वास्थ्य र रोजगारीको वातावरण बनाउने छु । सदरमुकामको एक मात्र सरकारी अस्पताल मेची अञ्चल अस्पतालको स्तरबृद्धिलाई निरन्तर अगाडि बढाएर गरिबीबाट पीँडितको स्वास्थ्य सुरक्षा पहिलो प्राथमिकतामा राखेको छु ।

यहाँ भएका उद्योगहरुको संरक्षण गर्दै नयाँ औद्योगिक क्षेत्र विस्तार गर्ने नीति तयार गरेको छु । एक घर एक रोजगारको न्युनतम खाका तयार पारेर वेरोजगारी घटाउने वातावरण बनाउने छु । यो नै भद्रपुरबासीको जीवनस्तर उकास्ने योजना हो । यी योजना कार्यान्वयनमा ल्याउन युवा वर्ग परिचालन गर्न सक्ने क्षमता ममा छ । जसका लागि नगरबासीको जनमत मैले प्राप्त गर्नै पर्ने छ ।

जनताले तपाईलाई पत्याउलान् ?
अवश्यै पत्याउने छन् किनकी म परिवर्तनको लडाँइमा दुई दशक यता सक्रिय रुपमा लागि रहेको छु । नगरबासीको हितका लागि मैले राजनीतिक कार्यकर्ता भएर निस्वार्थ रुपमा जनताका अधिकार र चाहना समेटेर काम गरिरहेको छु ।

जन सेवाका लागि सेवाको एउटा पाटो राजनीति थियो त्यस कार्यमा म विचलित भँइन अनि भद्रपुरका जनताको चेतना विस्तार र अधिकारका लागि निरन्तर काम गरेको हुँदा भद्रपुरका बासिन्दाले पत्याउने विश्वास छ । राजनीति बाहेक कुनै अन्य बाटो नहेरेको मैले सायद सवैभन्दा कान्छो उम्मेद्वार भएर भद्रपुरको नेतृत्व पाउने छु ।

युवा पुस्ताले नेतृत्व नलिएसम्म सुस्त भएको भद्रपुर तन्दुरुस्त हुने छैन । त्यसैले पनि भद्रपुरका बासिन्दाले मलाई पत्याउने आधार छ । यो नगरलाई व्यस्त र सम्पन्न बनाउने हो भने अवसरवादीले नेतृत्व पाउनु हुँदैन किन भने नगरबासीको सममस्या र दुःखका दिनहरुमा देखा नपर्ने तर निर्वाचनमा टिकट लिएर चिप्ला कुरा गर्नेहरुबाट नगरबासी सचेत हुनु जरुरी छ । यस आधारमा भन्नु पर्दा पनि मेरो उम्मेदवारी जनपक्षीय भएर आएृकाले अनुमोदन हुने विश्वास छ ।

विरोधीले तपाईलाई क्षमताले भन्दा शक्तिले राजनीतिमा अगाडि आएको आरोप लगाउँ छन् नि ?
यो निराधार आरोप हो किन भने मैले नेपाल विद्यार्थी संघ मार्फत राजनीतिमा प्रवेश गर्दा म आफ्नै क्षमता प्रस्तुत गरेर लाल किल्लाको रुपमा रहेको मेची बहुमुखी क्याम्पसको लाल किल्ला तोडेर दुई कार्यकाल सभापति भएँ ।

विद्यार्थी राजनीतिबाट ११ औं महादिवेशनपछि दलीय राजनीतिमा आउदा पनि मेरो क्षमतालाई हेरेर क्षेत्रीय सचिवको रुपमा आम काँग्रेसी कार्यकर्ताले जिम्मेवारी दिएका थिए । त्यस यता मैले पूर्ण रुपमा राजनीतिलाई अंगीकार गरेर नेपाली काँग्रेसलाई जनताको घरदैलोमा पुर्याउन झापा क्षेत्र नम्वर ३ मै रहेर निरन्तर नेतृत्वदायी काम गरिरहेँ । मैले एकाएक टिकट लिएर भद्रपुर झरेको होइन ।

हिजो पनि यहीँ थिएँ । आज पनि यहीँ छु । कसरी शक्तिले अगाडि आएँ त ? अवसरवदाको राजनीति गर्नेहरुले यस्तो आरोप लगाउन सक्लान् तर वास्तविक राजनीति गर्ने जो कोहीलाई थाहा छ । गणेश पोखरेलले भद्रपुरको काँग्रेसी राजनीतिमा जनमत तयार गर्न निकै पसिना बगाएको छ । समस्यामा परेका नगरबासीका समस्या हल गर्न इमान्दार भएर मेहनत पनि गरेको छ । यो कसैको दया वा शक्तिले गरिने काम होइन । जन सेवा हो । यसैले यहाँ शक्तिको प्रसंग कहीँ कतैबाट जोडिदैन ।

भद्रपुर किन विकसित हुन सकेन त ?
भद्रपुर नगरपालिका विकास हुन नसक्नुको प्रमुख कारण नगरको नेतृत्व लिएका नेताहरु भद्रपुरको सम्बृद्धि भन्दा आफ्नै व्यक्तिगत विकासतिर लाग्नु थियो । जनताले चाहेको नेतृत्व दिन विजेताहरु विगतमा असफल भए । सिमित भोट बैंक बनाएर नगरको नेतृत्व हत्याए पनि विगतका नेतृत्वकर्ताले नगरको उन्नति नगरेको स्पष्ट छ ।

अव सिमित भोट बैंकको आडमा भद्रपुरको नेतृत्व लिने समय सकिएको छ । जनताको काम गर्ने व्यक्ति छान्न नगरबासी सफल हुनेमा विश्वस्त छु । मैले यस नगरमा रहेर राजनीतिक रुपमा केही न केही काम गरेको छु । धेरै काम गर्न प्रशासनिक जिम्मेवारी आवश्यक छ । यो निर्वाचन मार्फत नगरबासीले मलाई सवल भद्रपुर बनाउने अभियानमा नेतृत्व दिने छन् । अब भद्रपुर नगर दुर्वल हुने दिन सकिदै छ । जसका लागि नेपाली काँग्रेसले नेतृत्व पाउनु जरुरी छ ।

 


सम्बन्धित शीर्षकहरु

कनकाई अनलाईनललितपुर, भदौ १ गते । रौतहट राजपुर नगरपालिकाकी उपप्रमुख जमिला असगरी स्थानीय तहको निर्वाचनअघि पनि सामाजिक कार्यमा सक्रिय हुनुहुन्थ्यो…

कनकाई अनलाईनयसबर्षको डि कौडिन्य पत्रकारिता पुरस्कार कनकाई अनलाईन तथा कनकाई साप्ताहिकका सम्पादक प्रकाशक लीलाराज झापालीलाई प्रदान गरिने भएको छ ।…

कनकाई अनलाईनशरणामती।झापाको झापा गाउँपालिकामा रहेको सशस्त्र प्रहरी बल नेपालको टाघनडुब्बा विओपीबाट २९ महिनामा सशस्त्र प्रहरी निरिक्षक सचिन प्रधानको सरुवा भएको…

प्रतिकृयाहरू